محدش يفتكر إني هعيد و أزيد في نفس كلام الأخ
عتمان. انا هاخد العنوان بس و أكتب في نفس الموضوع بس من زاوية تانية اجتماعية و
ليست سياسية بالمرة.
تخيل نفسك قاعد في كافيه نضيف بينزل شيشة, و على الترابيزة اللي جنبك في
اتنين أو تلاتة بنات بيشيشوا. أعتقد إن أول حاجة هتيجي في دماغك هي إن البنات دول
مش متربيين و معندهمش أخلاق. طب ايه أول حاجة بتيجي في دماغك لما بتشم ريحة مش
كويسة و في ست كبيرة قاعدة جنبك في الأوتوبيس؟ أكيد إنها لامؤاخذة ست معفنة.
طيب عمرك كنت هتقول كده لو كان الاتنين اللي قاعدين على الترابيزة اللي
جنبك ولاد مش بنات؟ هل كنت هتتقرف بنفس درجة القرف من الراجل المعفن اللي جنبك؟ هل
لو شفت راجل بيشرب سجاير هتشتم فيه في سرك زي ما كنت هتشتم البنت اللي بتشرب
سجاير؟
طيب تعالى نكلم البنات, هل انتي لما بنت صاحبتك بتطلب منك فلوس بتستغربي زي
لما ولد يطلب منك نفس الطلب؟ هل لما بتشوفي بنت مبتصليش بتنصحيها بنفس مقدار
النصيحة اللي بتنصحيها للولد؟ طيب هل انتي عندك استعداد لو فقيرة تنزلي تسوقي ميكروباص
(مع احترامي لمهنة سواق الميكروباص)؟ هل لو اضطرتك الظروف إنك تشتغلي أي حاجة
هتعملي زي ما الولد بيعمل؟
طبعا إجابة الأسئلة اللي فوق دي كلها هي لأ. ده بعينه هو الكيل بمكيالين.
ناس كتير أوي في مصر بينادوا بالمساواة بين
الراجل و الست. مع إننا في طبيعة حياتنا بنهاجم الستات اللي بيدخنوا و بنهاجم
الراجل العاطل و البنت اللي بتشتغل شغل رجالة. دايما بيتريقوا على البنات اللي
دخلوا هندسة قسم مدني و يقولوا إنهم عمرههم ما هينزلوا موقع و يتعاملوا مع عمال.
دايما بنهاجم الممثلات اللي بيعملوا أفلام فيها مشاهد مخلة بالآداب و مابنهاجمش
الرجالة اللي بيبقوا معاهم في المشاهد دي. دايما اللي بيتقدم للجواز هو الولد مش
البنت. دايما بنلوم الولد اللي بيتخرج و ميشتغلش و مبنلومش البنت اللي اتخرجت و
مبتشتغلش. بخصوص موضوع الشغل ده في رد من بعض البنات بينرفزني أوي. لما تسألها
نفسك تعملي ايه بعد ما تتخرجي من الكلية تقولك اتجوز و اقعد في البيت وأربي عيالي.
طيب طالما هتقعدي في البيت, ليه بتدخلي كلية و بتدخلي تدريبات من أساسه؟ مش
كان اولى تسيبي المكان اللي انتي أخدتيه ده لحد نفسه يشتغل في المجال اللي انتي
بتدرسيه ده؟ مش كان أنجزلك إنك تقعدي في البيت بعد الثانوية العامة؟ و لا هو اللي
هيتقدملك هيبص في كارنيه النقابة بتاعك قبل ما يخطبك؟
نفس الكلام للولاد بخصوص الشغل. دايما تلاقي ولاد يقولوا انا لما اتجوز
هقعد مراتي في البيت و مش هخليها تشتغل. طب هي خدت شهادتها الجامعية دي ليه؟ و لا
هي فلوس بتندفع في الأرض؟ ولا انت عايز تبقى سيطرة في البيت ؟
اللي عايز يعمل مساواة بين الراجل و الست لاازم يضمن حقوق الجنسين في كل
النواحي. زي ما من حق أي ولد انه يدخن يبقى من حق البنت انها تدخن و محدش يشتمها.
زي ما الولد بيقعد جنب السواق في الميكروباص يبقى برضه البنت من حقها. زي ما أي
شغلانة مش عيب بالنسبة للولد يبقى برضه مش عيب بالنسبة للست. أنا مش هستند للدين
عشان المفروض البلوج ده مجرد من أي صفات عرقية أو دينية أو سياسية.
ببساطة كده, اللي بيقول انه في فعلا مساواة بين الراجل و الست يبقى مش
فاهم. و الحل هو إنه يبقي الوضع كما هو عليه و يلغوا كلمة المساواة أو فعلا نبطل
نكيل بمكيالين و نبطل نفرق بين الراجل و الست اكترمن ما هما متفرقين. ببساطة أوضح هو
إن منظمات حقوق المرأة و حقوق الرجل مش شايفة شغلها كويس.
عايز الحل؟ احسبها بالعقل...مش بالعربية
النقل!!!!
السير فيروتشي
السير فيروتشي
ليست هناك تعليقات:
إرسال تعليق