عندنا مشكلة كبيرة أوي في الشباب. الواحد مننا لما بيحب
بنت بيبقى عايز يشوفها على طول و يخرج معاها و يتكلم معاها عن السياسية و الأدب و
الأفلام و الكتب اللي قراها و أنواع المطاعم النضيفة.
ناس مننا بيرتبطوا و ناس لأ. و النوعين دول
غلطانين في حاجة ألا و هي السرية في الارتباط. البنت من دول بتخاف تقول لأهلها
عشان ميعلقوهاش في السقف أو بيرفضوا الموضوع من أصله عشان يبعدوا عن المشاكل.
سؤال
للأهالي. هل بكده انت ربيت بنتك؟ هل بكده بنتك مش هتحب حد؟ هل كده انت متأكد مية
في المية إنها مش هتكلم مع ولاد؟
تعالي نشوف
أربع حالات...حالتين منهم كويسين و حالتين منهم مش كويسين. خلينا نفترض إن بنتك
بتحب ولد و لنفترض إنه شاب مش محترم و بيلعب بدماغ البنت. و دلوقتي انت بطريقة ما
عرفت انها مرتبطة بيه سريا و بعد كده رحت ضربت البنت و زعقتلها و خدت الموبايل
بتاعها. تفتكر البنت هيكون ايه اللي بيدور في دماغها. البنت هتعيش في جو الحب
الضايع و هتتعلق بالولد ده أكتر و هتقل في نظر بنتك كتير.
الحالة
التانية مش مختلفة أوي. هنشيل الواد المش محترم و نحط بدل منه ولد محترم. الموضوع
هيكون أسوأ لأن البنت هتحبه أكتر و هتنشف دماغها في الجواز و هتقل في نظرها كتير
أوي.
الحالة
التالتة بقي مختلفة: نفترض إنك عرفت و طلبت إنك تشوف الولد ده و تتكلم معاه في
وجود بنتك. لو الولد ده مش محترم انت نفسك هتبين لبنتك إنه مش محترم. البنت هتصرف
نظر عن الشخص ده و هتكبر في نظرها جدا و هتثق في كل نصايحك. و الولد ده مش هيتجرأ
يكلم البنت تاني عشان لو كلمها هتهزأه.
الحالة الرابعة بأه: الولد شفته و طلع انسان
محترم بس هو محتاج وقت عشان يتقدم رسمي. انت هتطمن على بنتك عشان هي مع ولد محترم
و بنتك هتحبك حب غير عادي و هتشيلك فوق راسها و هتسمع كلامك في كل حاجة. و الولد
بعد كده لما يحب يخرج معاها هييجي لحد بيتك ياخد بنتك كعززة مكرمة و يرجعها بيتها
معززة مكرمة.
طيب انت
دلوقتي هتسألني و هتقوللي و الناس تقول ايه؟ فيها ايه لما كل الناس تعرف ان فلانة
مرتبطة بفلان و بعد فترة هيتجوزوا؟ هتقوللي إنه ده دور الخطوبة. فهرد عليك و أقولك
إن أيام الرسول عليه الصلاة و السلام ماكنش فيه حاجة اسمها خطوبة و إن دي تقاليد
عربية مبتدعة مالهاش علاقة بالدين. فاعتبر إن الارتباط ده خطوبة و مش لازم تعمل
زيطة و حفلة و تصدع جرانك و تصرف فلوس كتير عشان تجيب شوية ناس و تأكلهم ديك رومي
و جاتوه. الموضوع أبسط مما تتصوروا.
علبة
الشوكولاتة المتينة اللي هيجيبها الولد لحد بيتك و تشوفه و تتلكم معاه و تدخله
بيتك بدل ميدخله من الشباك. و انت اللي هتبقى متحكم في الأمر مش البنت أو الولد.
اللي جرب الموضوع ده مش كتير بس الناس دول أقروا إن الطريقة دي كويسة و فيها مكسب
لكل الأطراف.
أهم حاجة بس
إن الولد و البنت ميخلوش الموضوع سر و يقنعوا اهل البنت إنهم يشوفوا الولد و
يحكموا عليه.
خلي كل حاجة قدام عينك بدل ما تنام عينمفتوحة و عين
مقفولة.
و بالعقل...مش
عربية نقل!!!!!
السير فيروتشي
انا معنديش اى مشاكل على عرض الرأى , كل واحد عنده رأيه الخاص فى اى موضوع. لكن لو هنتكلم عن الدين يبقى هنا لازم وقفه. لما تحب تذكر رأى الدين فى أى موضوع يبقى حضرتك لازم تجيب على الاقل حدث او قصه متعارف عليها أيام الرسول العلماء أجمعوا على وجودها أو حديث نبوى او ايه من القران كدليل على اللى انت بتقوله غير كده مينفعش الكلام ده يتقبل و الا حضرتك تبقى مسؤل عن أى حد ياخد التفكير ده و يعمل بيه و هتتحمل مسؤلية تفكير خاطئ لبنى أدم مفكرش فى اللى انت كاتبه.
ردحذفأما بقى بالنسبه للموضوع نفسه بدون التطرق لأى مواضيع دينيه لان واضح ان حضرتك غير مثقف دينبا. احنا فى مجتمع شرقى و الحمد لله على النعمه دى. نعمه الكرامه و العزه و الحياء و حشمة الراجل لاهل بيته و لو فى بنت بتفكر و بتعمل كده من ورا اهلها فده عشان هى متأكده ان اللى بتعمله غلط و برده مننساش السبب اللى خلاها تعمل كده هو البعد عن ربنا و عدم غرس الفضائل و الحب الاسرى اللى خلاها تدور على الحب ده بره.
اما بقى لحكم الدين و الاسلام فى الارتباط بين الولد و البنت فدى حضرتك مش هتتعب انك تلاقيها و تعرفها سواء من الداعيه الاسلاميه او هتقرا فى القرأن او تدور حتى على جوجل ف انا مش هتعب نفسى انى اقولك.
الحق قدام عنينا بس مين يتجرأ يبصله.
البلوج ده اسمه بالعقل مش عربية نقل.....مبنفكرش في المشاكل من ناحية دينية مبدئيا احنا بنفكر في حل المشاكل بطريقة عقلية و منطقية بحتة.
ردحذفبما إني مش مثقف دينيا زي ما حضرتك بتقولي تعالي ناخد الموضوع ببساطة من ناحية الدين لو هنتكلم في الموضوع دينيا. العلانية شرط أساسي في ارتباط اي ولد ببنت عشان ميكترش عليهم الكلام. فلما يكون الموضوع علني قدام الناس فده هيبقى الحقيقة اللي هتخلى الناس تحط لسانها في بقها.
بس بما إننا شعب بيحب الدهب و الفلوس فالخطوبة اللي المفروض معناها هو فترة تعارف بين الولد و البنت (فترة ارتباط من الآخر) بقت حاجة صعبة جدا على الولد في ظروف البلد دي و في ظل طلبات أهل البنت التعجيزية. فلا مننا ساعدنا على علانية الموضوع و لا مننا ساعدنا ولادنا على الجواز.
الخطوبة أصلا حاجة مجتمعنا عملها عشان الولد و البنت يتعارفوا. و احنا بنصعب الموضوع على الولد. فبكده الخطوبة فقدت معناها. معلش يعني لو الموضوع مش مكلكع في دماغ الأهالي (أصل بنت اختي عملت فرحها فين...بنتي مش أقل من بنت اختي....أصل الواد خريج تجارة...أصله لسه في كلية) كان الولد هيخطب بمجرد إنه يحب واحدة.
أولا بالنسبه للبلوج و اسمه انا بحترمه جدا و من متابعيه كمان و بتعجبنى أراءه جدا و ده سبب انى بكتب الكومنت و مهتمه انى أوضح صوره لو مش واضحه و أفهم لو انا مش فاهمه احنا مش ملايكه.
ردحذفثانيا: بالنسبه للموضوع الاساسى العلانيه اللى حضرتك اتكلمت عنها دا رأى صح و انا معنديش اى اعتراض عليه فيما يطابق تعاليم الاسلام و السنه النبويه اللى احنا عارفينها و اللى بتتلخص فى انهم يكونوا متزوجين او يكون بينهم محرم لو مش متزوجين دا دينيا.
ثالثا: موضوع الخطوبه و الدهب و الفلو س و ما الى ذلك انا متفقه معاك فيها جدا و عارفه اللى بيحصل و كلنا بنشوف و أعتقد ان دى الرساله الاهم اللى لازم توصل لكل اب و أم مش انهم يسبوا بناتهم يروحوا و يجوا زى ما يحبوا تحت مسمى "العلانيه".
الاختلاف فى الرأى لا يفسد للود قضيه ,, انا مش شيخه و مش بقول انى بطبق كل حاجه بالحرف الواحد انا بغلط برده . مش حاجه أفرح بيها بس بتمنى انى أكون احسن. و فى الاخر هى حسبة عقل مش عربية نقل.