الكيل بمكيالين
الكيل بمكيالين هو انك تشوف موقف واحد
بطريقتين مختلفتين. الطريقة الأولى هي انك تكون معاها لمجرد ان الموقف ده حصل من
واحد انت بتحبه او من نفس تفكيرك أو تكون ضده برضه لمجرد انه طالع من شخص ليه
طريقة تفكير غيرك او انت بتكرهه.
أمثلة على كده كلنا بنقع فيها ان امبارح في
جلسة مجلس الشعب قام النائب السلفي ممدوح اسماعيل برفع آذان العصرفي وسط الجلسة.
الموقف ده زعل ناس من فصائل غير اسلامية كتير لمجرد ان الراجل ده اسلامي وانك
شايفه خروج عن النظام في مكان مفروض (المفروض يعني) إنه يكون منظم. مش مشكلة انك
تزعل من ده....حقك. لكن المشكلة انك تنكر كل اللي في الجلسة :انه محصلش و تمسك في
المشكلة دي. بالضبط بنيجي في الهايفة و نتصدر.
نفس البني آدم اللي فوق ده زعل جدا من موقف
الإخوانجية لما شافوا النائب محمد أبو حامد بيرفع خرطوش (واحد فارغ و التاني مش
مضروب) و انهم علقوا على إن النائب محمد أبو حامد جاب الخرطوش السليم ده منييييين؟
و كان بيقول على الإخوانجية دول إنهم برضه جم في الهايفة و اتصدروا. لأن القضية
الأساسية هي أن الداخلية ضربت خرطوش بالفعل و الصور مالية النت. ده كيل بمكيالين.
مثال تاني: لما النائب محمد مصطفى اعترض على
قول النائب محمد أبو حامد بأن الداخلية ضربت خرطوش و جاب دليل في جلسة أول امبارح
بحجة "إن جاءكم فاسق بنيأ فتبينوا" و بعض النواب المنضمين لنفس تيار
النائب محمد مصطفى سقفوا على كلامه ده. مع إن النائب محمد أبو حامد كان جاي
بالدليل. المشكلة إن نفس النواب دول سقفوا على كلام مصطفى بكري اللي اتهم اتهام
واضح لبعض الثوار انهم بلطجية و قابضين من العميل الأمريكاني (من وجهة نظره)
الدكتور محمد البرادعي مع ان النائب المحترم مصطفى بكري لم يأت بدليل على ذلك. و
في هذا عدم العمل بقول الله تعالى "إن جاءكم فاسق بنبأ فتبينوا"....ده
الكيل بمكيالين.
مثال كمان: بعض الاسلاميين المحسوبين على
تحالف النور يتهموا-بدون دليل- حركة 6 ابريل بالعمالة و تنفيذ اجندات خارجية. هنا
ظلم واضح ل6 أبريل. برضه بعض أعضاء حركة 6 أبريل يتهمون تحالف النور و التيار
السلفي بالعمالة و التمويل الخليجي. وده ظلم واضح للتيار السلفي.
هؤلاء المنتمين لتحالف النور يعدوا ما يقال
عليهم من تمويل خليجي أنه ظلم....في نفس الوقت اللي هو بيتهم 6 ابريل بنفس التهمة
الخايبة بدون دليل. و هؤلاء المنتمين لحركة 6 ابريل يعدوا ما يقال عليهم من تمويل
و أجندات خارجية أنه ظلم و افتراء. في نفس الوقت اللي هو متهم ظلم في التمويل
الخارجي.....ده الكيل بمكيالين.
يعني
انت معندكش عقل؟ فين المنطق؟ فين الحيادية؟ فين مخك اللي هاريه في كتب الكلية و
امتحانات السودان؟ لحد امتى هتفضل واقف مع صاحبك في آراءه الغلط عشان مجرد انه
صاحبك في نفس الوقت اللي بترفض فيه نفس الرأي من قريبك اللي بتتخنق منه لما يعدي
عليك في البيت؟
الكيل بمكيالين مش بس ظلم للي قدامك. لكن ظلم
لأسمى حاجة انت بتمتلكها كإنسان و اللي هو العقل. يعني انت لما بتكيل بمكيالين
بتفقد من نفسك صفة الانسانية. و عندما تفقد هذه الصفة, فكر في الشيء الذي ستتحول
اليه.
حاول لما تشوف موقف في حياتك, تنسى خالص انك
تبع تيار او انك تعرف أي حد من أطراف الموقف. حاول تحط نفسك مكانه و تشوف انت
هتفكر ازاي و لو معرفتش, شوف أنصار نفس الموقف و ردهم على ان ده اساءة ولا لأ
وافهم وجهة نظرهم. دي المفروض (المفروض يعني)انها حاجة سهلة. و لو انت شايف انها
صعبة يبقي أكيد أكيد انت مقرأتش عن وجهة نظره أصلا و مكونتش رأيك في انك ضده من
نفسك و لكنك ماشي ورا قطيع. شوف بقى لما تلاقي نفسك ماشي في قطيع. فين انك انسان
في كده؟
بالعقل....مش عربية نقل!!!!
الأخ عتمان.
ليست هناك تعليقات:
إرسال تعليق