عقلياً ولا .... واقعياً؟؟!!

كان في جملة كدا قالها النجم محمود ياسين لأحمد السقا في فيلم الجزيرة ..قال ... في بلدك تبيع حتة سلاح تبقى تاجر سلاح وضد القانون ,,, تبيع ألف تبقى وزير .... وده كان إسقاط على المشير أبو غزالة
للأسف أصبح الوضع الان .. في بلدك إنك لو قتلت واحد أو اثنين إعدام أو مؤبد أو سرقتلك سريقة أو اثنين تأخدلك كام سنة سجن ,,,, بس لو قتلت 900 واحد و سرقت 30 سنة في بلد كاملة و سيبتها عرضة لأصحابك اللي يسووا واللي ميسووش إن شاء الله هتاخد 3 شهور في قصر في شرم الشيخ وتُحاكم محاكمة هزلية عشان تاخد براءة

بقى الموضوع ماشي بالعكس كل ما ترتكب مصايب أكتر كل متعرف تخلع من أي مساألة بشرية كل متزود كل مايكون أحسن .. للأسف لما تيجي تفكر في الموضوع و تلاقيه فعلاً بالشكل ده تتصدم كل الفكرة إن احنا مش عارفين نفكر فيه كدا لإن احنا عايشينه و لو فكرنا شوية و لقينا كدا هنكره نفسنا لإنه ازاي احنا سكتنا لغاية ما وصل بينا الوضع لكدا.... يا رب ارحمنا يا رب
أنا دلوقتي بس عرفت ليه طنطاوي قاعد كل ده على قلبنا و عمال يقتل فينا أصلوا لقى نفسه فجأة قتل لاتنين أو تلاتة فقالك لأ خلاص أنا لبست و لازم أكمل المشوار للأخر عشان ميلبسش أحمر في الأخر كدة أأمن بكتير اقتل أكتر أصل المشكلة إن هو مش شايف مبارك بس اللي كدا أدينا شايفين كلنا حد ذي علي عبدالله صالح اللي في ناس كانت بتدورله على خروج أمن بردو (زي ناس عندنا كدا ) برغم اللي عمله في الشعب اليمني .... حاجة تقرف ولله :@

صوت العقل بيقول إن كل ماتعمل خطأ تحاسب عليه و كلما يزيد خطأك كلما تزيد عقوبتك لكن للأسف ..... صوت الواقع بيقول العكس

حوار بين 2 زملاء في كلية واحدة
الأول : سؤال مهم بغض النظر ان كل واحد شايف الاضراب هو الحل او مش هو الحل : انت مش هتنزل تحضر المحاضرة بكرة ليه؟؟؟

هتقول حاجة من الاتنين ياما مش نازل علشان اشارك فى الاعتصام المدنى ياما حداد على ارواح طلبة كلية هندسة اللى ماتوا فى الاحداث اللى فاتت.
1- لو علشان تشارك فى الاعتصام المدنى فانت اصلا طالب يعنى معندكش فى الوقت الحالى انتاج علشان تمتنع عن تقديمه و مش هتشل اى حاجة فى عجلة الانتاج بتوقفك عن التعلم لمدة يوم ، الناس اللى هتعمل اعتصام مدنى ده اللى انتاجه بيأثر بشكل مباشر فى الاقتصاد و قد يكون غير مباشر بس فى النهاية انتاجه بيصب فى ايد اللى ماسكين السلطة، انت اقصى حاجة ممكن تشارك بيها فى الاعتصام ده انك ماتحولش تتكلم فى التليفون كتير اليوم ده ولا تشترى حاجة ولا تدفع مصاريف او رسوم حاجة ولا تركب مواصلات عامة.
2- اما لو السبب حداد فاحنا طول عمرنا عارفين ان التعبير عن الحداد ظاهريا بيتم عن طريق ارتداء ملابس سوداء مش التوقف عن العمل زائد ان امتناعك عن العمل او التعلم مش هيقدم ولا هيأخر اى حاجة للناس اللى راحت، انما المفروض انك ماتضيعش اى يوم كان فيه فرصة انك تتعلم فيه لانك بدراستك يمكن تعوض شوية فى المستقبل المهندسين اللى احنا فقدناهم.

الثاني :  طب أنا عندي إقتراح جامد أوي ... مين هنا ممكن أقتله أخوه ولا أبوه ... و أنا معنديش مانع أعمل كدا لإنهم بيعيش عيشة حلوة أوي بعد كدا مدام اللي اتقتل ده من الثوار .... و نعمل لجنة تقصي حقائق و إنت تروح كليتك عادي خالص ولا كإن حاجة حصلت لإن إنت كدا كدا يا عيني عليك مش هتقدم ولا هتأخر ... اللي موافق يقول أنا معنديش أي مانع زي ماقلت!!!!

الأول ده صوت الواقع بالطريقة اللي احنا إتعودنا نعيشها من ناحية إن الحاجات د مش بتجيب همها و إن مفيش حاجة بتحصل و إن الحركة الطلابية لم تعد كما كانت من قبل في تأثيرها في الرأي العام ... أما الثاني ده هو صوت العقل إن هو مش قادر يحضر في مكان فيه واحد صاحبه كان بيبقى جانبه في المدرج ده و اتقتل غدراً و مجبش حقه لغاية دلوقتي والله اللي قبله جاب حقهم

صوت العقل ساعات بيبقى غريب على ناس متير أوي. وده للأسف عشان اللي بيفكر أكتر بيتعب أكتر و احنا بنحب نستسهل. عشان كده تقريبا الانسان في معظم الأوقات بيتصرف معتمدا على صوت الواقع في حالة تعرضه لموقف أكثر من مرة و كان التصرف ده دايما اللي بينفع وقتها. تقريبا صوت العقل ما كانش بيبان إلا في الحالات الفريدة من نوعها. إذا صوت الواقع مستمد من تجربة أو خبرة.و المصيبة الكبيرة إن التجربة اللي عشناها دي مانت كلها غلط في غلط و عكس صوت العقل لأننا عشنا في نظام وسخ تفشى فيه الجهل و الفساد في كل شيء حتى في بيتك. لازم عشان تعمل أي مصلحة, تعمل حاجة غلط ضد عقلك و مبادئك و تعاليم دينك...حاجة تقرف..و نيجي بعد ده كله و بعد ما خلصنا من النظام الوسخ اللي كنا عايشين فيه برضه ماشين بصوت الواقع اللي مليان بقذارة النظام السابق و شايفين إن ده الطبيعي عشان انت متعود على القذارة و معندكش مانع تعيش في قذارة أكتر لأنك اتعودت على كده. إحنا اللي ادينا الفرصة للمشير يعمل نفس اللي بيعمله مبارك و ده عشان الثورة لسه منضفتش عقولنا.

طبعا صوت الواقع ده عالي أوس اوي عند الجيل اللي عنده 50 سنة و انت طالع و بيقل الصوت ده وانت نازل. و هو ده صراع الأجيال اللي سببه ناس عاشت عيشة مرة أوي و كان هدفهم يربوا جيلنا كويس و لما تكبر تلاقي كل حاجة جاهزة ليك عشان تعيش كويس.و عشان كده فضل الجيل ده ماشي جنب الحيط طول حياته. (طبعا شكرا ليهم اوي على كل اللي عملوه معانا)  بس تفتكر ايه هي الخبرة اللي هتستمدها من الوقوف جنب الحيطة؟

أرجوك قبل ماتشوف أي موقف أو تتكلم فيه تنسى كل خبرتك و تتعامل غلى انك لسه عيل صغير ماتعرفش حاجة.على الأقل لما تغلط ساعتها هتاخد خبرة نضيفة.

علي صوت عقلك دايما و لو كلنا عملنا كده هتلاقي مصر بتنضف اوتوماتيك. العقل هو الحاجة الوحيدة اللي ميزنا ربنا بيها عن باقي المخلوقات. فمتلغيهوش.

و بالعقل.....مش عربية نقل!!!

الأخ عتمان