بخصوص الناس اللي بيقولوا إنهم هيروحوا شغلهم
يوم 11 فبراير عشان ميخربوش بلدهم. أنا عمري ما شفت حماسة للشغل كده. كانت فين
الحماسة دي من زمان؟
أكيد طبعا و بدون مناقشة, حزب الكنبة...آسف قصدي الناس الكبار اللي من سن
أبويا و أبوك هما اللي هيروحوا الشغل. تعالى كده في يوم عادي قبل الثورة و
روح طلع كارنيه الكلية بتاعك من شئون الطلبة. طبعا نص اللي بيقرأ الكلام ده دلوقتي
بيشتمني عشان فكرتهم بأيام العذاب. روتين رويتن روتين. كان دايما بتوع شئون الطلبة
يكفروك في عيشتك عشان تاخد حتة بلاستكة مالهاش أي تلاتين لزمة و عاملة زحمة في
محفظتك على الفاضي. ده لو طلعتها في معادها أصلا.
طب جرب كده روح مجمع التحرير و خد المنحة الدراسية بتاعتك (لو انت مغترب)
أو روح جدد الباسبور بتاعك. قابلني لو لحقت معاد طيارتك. أو جرب خلي ابنك يروح
مدرسته و يفهم حاجة من المدرس اللي دايما بيدي الحصة الأولى و التانية و بعد كده
يمضي انصراف و يروح يشوف دروسه الخصوصية. أو روح كده بنك و اسحب فلوس ليك مثلا
ووريني ازاي مش هتتخانق مع الموظف اللي بيديك الفلوس بسبب الروتين القذر اللي
محطوط.
مش
دايما هم دول الناس اللي كانوا بيقولوا "أنا هخلي صاحبي يمضيلي حضور و انصراف
وانا هقعد النهاردة في البيت" ؟ مش هما دول نفس الناس اللي بيطيروا من الفرحة
لما يلاقوا المكتب بتاعهم مقفول عشان في مظاهرة أو إضراب عمالي جنب الشغل بتاعهم؟ و
بعد كده النهاردة بيقنعوا نفسهم إنهم لو ماراحوش الشغل البلد هتبوظ. ما كانت كده
كده بايظة بسببهم....ده بأه اسمه "التحوير على النفس"
للأسف معظمنا بيحور على نفسه سواء كان ثوري أو كنبة أو إسلامي أو ليبرالي
أو بتنجاني. و بقول معظمنا لأن في فعلا ناس صادقة و عندها ضمير. لأنك لو انت دكتور
أو صيدلي لازم تنزل شغلك عشان شغلك متعلق بحياة ناس. مش مهم يجوعوا أو يعطشوا بس المهم
يعيشوا. انا كنت طول عمري بكره الطب و الدكاترة لكن اللي شفته انا و الرفيق زناتي
و الأخ عتمان في التحرير أجبرني على أني أحترم كل مهنة ليها علاقة بالطب.
أما بالنسبة لأكتر ناس بتحور على نفسها هما الطلبة اللي عايزين يحضروا.
الاضراب جاي في أول يوم للدراسة يعني مفيش سكاشن و مفيش مادة مفيدة تروح تذاكرها
في البيت. غير انك بترغم الدكاترة انهم ياخدوا غياب و يحرموا ناس كتير هتضرب من
درجة ممكن تكون هتفرق معاه في آخر السنة على النجاح. دول أكتر ناس بكرههم كره صريح
لأنهم مبيفكروش غير في نفسهم. و كانوا دائما بيخربوا خطط الدفعات اللي بتتظلم من
الدكتور. تلاقي دكتورين خدوا غياب في نفس المحاضرة و في نفس الوقت و لما الدفعة
تتفق انهم مايحضروش للدكتور ده عشان ظلمهم, تلاقي اتنين أو تلاتة دحيحية حضروا
بحجة انهم لقوا نفسهم فاضيين. ده طبعا غير المصايب اللي حصلت أيام أحداث محمد
محمود و معظم الطلبة اتفقوا انهم مايحضروش امتحانات الميدتيرم و تلاقي كام واحد
دحيح منفسن دخل و حضر. و ظلموا تلاتين واحد معاهم.
ده
اللي أنا متوقعه يحصل في يوم الإضراب. ناس طول عمرها ماشتغلوش في الأيام اللي كنا
محتاجينهم يشتغلوا. هينزاوا يشتغلوا في الأيام الوحيدة اللي عازينهم فيها
ميشتغلوش. و طلبة هتروح تحضر المحاضرات ولا كأن في بني آدمين بتضرب و بتهتف تحت
القاعة. اللي أنا بقوله لكل الناس. متسكتوش على الفئة دي لأنها دائما هتكون عقبة
في طريقكم لما تيجوا تتفقوا على حاجة. و ده انذار مني شخصيا لكل واحد هيحضر محاضرته.
اللي هاشوفه بيحضر مش هسيبه في حاله و مش هخله يركز خالص و لو وصلت بيه الوقاحة
انه يزعق هضربه. مفيش ديموقراطية في الاضراب. يا إما كله يشتغل يا إما كله
مايشتغلش عشان يبقى في نتيجة.... وبالعقل....مش عربية نقل!!
السير فيروتشي
ليست هناك تعليقات:
إرسال تعليق