بالعقل, مش عربية نقل!!
ده المكان الوحيد اللي انا هكون فيه نفسي و
أصحابي هيكونوا فيه نفسهم. انا زهقت من إني كل يوم اتفرج على التليفزيون و أشوف
مصايب بتحصل في البلد دي و في العالم و برضه لو بيعترفوا بالمصيبة, بييجوا في
الهايفة و بيتصدروا.
انا زهقت من إني مش شايف المشاكل بتتحل من
جذورها...ببساطة عشان المجتمع اللي احنا فيه مبقاش مدرك ايه المصيبة أصلا.
حاولنا نعبر عن رأينا كشباب في فيسبوك و
تويتر بس عايزين الكلام ده يفضل موجود لعل و عسى في يوم من الأيام بعد 100 سنة ناس
تكون عايشة نفس الوضع بتاعنا و تستفيد من اللي عشنا فيه.
من خلال البلوج ده "بالعقل مش عربية
نقل" الناس اللي بيفكروا زينا هيشكلوا إعلامهم الخاص. و كل بني آدم هيقرا
الكلام ده هينضم لشبكة الإعلام دي. مش مهم البلوج ده فكرة مين و لا مين اللي بيشرف
عليه و لا مين اللي بيكتب. احنا مجرد ناس متوسطين في الحالة المادية و الاجتماعية
و عندنا حقايق و أفكار شايفين إن الناس لازم تفكر فيها يمكن تغير من حال البلد.
ناس ممكن تفتكر إن البلوج ده ممكن يكون مجرد
صفحة غلى النت بيكتبوا فيها شباب مهزوم و محبط و بيعبر عن حزنه و أسفه إنه في بلد
مش فاهمة قدراته لكن البلوج ده هو الحاجة الوحيدة في حياتنا اللي ما فيهاش كدب و
مبنية على وجهات نظر اللي جاية من حقايق بعد تفكير منطقي من أكتر من توجه.
المشكلة الكبيرة أوي اللي احنا عايشين فيها
هو إن أي حد بقى يفهم في كل حاجة و كله بيقول أي حاجة و محدش فاهم حاجة. مثال على
كده: "أصل الفيديو ده فوتوشوب...أصل الراجل ده ماسوني..أصل الإعلام ده
امبريالي ليبرالي...أصل ده بلطجي...و مصر مش تونس... و بتوع 28 مش هما بتوع
25" الكلام ده حفظناه. احنا متأكدين 100% إنك عمرك ما جربت تكتب كلمة
"ماسونية" في جوجل و تدوس على اللينك بتاع ويكيبيديا اللي بيعرف معنى
الماسونية. و ماله لما تقرأ و تفهم؟ و ماله لما تفكر بعقلك مش ب.....؟
كل الهدف من اللي احنا عايزين نوصله للناس هو
نعرفهم المعاني و الكلام اللي بيتكلموا بيه. عايزين نعلمكم ازاي متستسلموش لإعلام
كله حاجة عبارة عن فيديو و صور. مفيش حد فينا متهم و القاضي هو ربنا و كلمة
ليبرالي أو شيوعي أو علماني مش تهمة. و السلفي مش متخلف. خلينا على الحياد. احنا
في الأول و في الآخر مصريين و عرب. و بالعقل مش عربية نقل.
نداء لكل اللي قرأ الكلام ده. مش هرخم عليك و
أقولك "استحلفك بالله ان تنشر هذه المدونة" مبدئيل كلمة مدونة بتضايقني.
المهم وصل الصوت ده للناس لو انت مقتنع بيه. لو انت شايف إن الكلام ده كان في قلبك
و كان نفسك تقوله من زمان ابعته لصحابك و خليهم يقرأوا و يفهموا و اللي مش عاجبه
كلامنا يرد علينا. احنا شباب زي بعض و كلنا هنحل مشاكل بعض واللي عنده حاجة مفيدة
يقولنا و نكتبها يمكن تنفع حد في زمن تاني في مكان تاني.
ليست هناك تعليقات:
إرسال تعليق